THE ADVENT OF CHRISTMAS


JESUH SUAH LUNGDAM PAWI#
Pum Khan Pau

Kristian kumsim dan ah December kha pen khatawp ahih bangin hih kha i tun simin I lungsim ah hun khat a zo ding bangin kingaihsutna hong om hi. Kum khat sung tawntung I nasepna, pilna zonna leh kizatnate a kuitung bangin I kikoih hi. Lokho mite in kum khat I khawh annte kikaikhawm khinin ki-awllen a, sangnaupangte in zong kum khat a sinte laivuanin man khin hi. Sumbawl mite adingin awllen cih a om theih taktak loh hangin kumpi nasemte in zong December kha pen hun awl ngah sawm hamtang ciat uh hi. Nidanga khuata ah om hunlai bang lo-in tuhun ciangin innkuan khat zong mun leh gam tampi ah kikhenta ihih manin khatawp pen I khua I inn ah kituahkhopna in mi tampi in kizang thei hi.
    Ahizongin, December kha pen awllen hun bek na hi zenzen lo hi. Tua sanga thupi zaw tham pen Khristiante adingin Lungdam Bawl/Pawi hun ahi hi. Tua ahih manin awllen hun tawh kituakin Lungdam Pawi zang dingin khualgama om gamvakte, sumbawlte, sangkahte, zumnasemte, galkapte ahi thei bangbang inn ah ciahin, inn omte’n zong a nuam thei pena Jesuh suah pawi zat dan ding ngaihsunin i hunte i mawk zat nawnloh hun ahi hi.
    Naupangte adingin hih hun pen a tuampi khat hi. Phalbi tungin khua votta ahih manin puanlum, puanthak neih hun, ciin amau ciamteh ding hi.
     December kha pen Khris hong pai kha (the advent of Christ) ciin thu leh la leh nopbawlna tuamtuam tawh kizanga, Lungdam Pawi hun a tun taktak ma nangawnin kimaleep hi. December 25 pen a maan pen ahih loh hangin mi tampi in Jesuh suah Lungdam Pawi in kizang ahih manin tua tawh kisai theihhuai pawlkhat kikum ni.

Khris-Mas Gift: Rome mite in December 17-24 pen Saturnalia Pawi in zang uh a, tua hun sungin deihsakna van kipia uh hi. Kristiante in Khrismas/Lungdam Pawi cianga van kipiak i zat pen tua pana kila hidingin ki um hi.

Khris-Mas Tree: Khrismas cianga sing hing hoih nono leh paak kilawm leh meitaang hoih nono tawh inn zep, biakinn zep a kizang pen Rome mite i zat mah pana kila hi. Mi pawlkhat in Khrismas Sing pen German gama Mikang missionary Boniface i pat hi ci uh a, pawlkhat in bel Martin Luther pat masak hidingin um hi.

Santa Claus: Asia minor a bishop St. Nicholas in deihsakna tawh mite letsong pia pahpah ahih manin Santa Claus pen ama min kitom lak hi, kici hi. Tu-in Santa Claus a kigen ciangin deihsakna letsong pia/hawm gennopna hipha deuh hi.

Jesuh Judah Kumpi’ Suan Mah Hiam?

Laisiangtho sungah Jesuh khanggui a kan nih om a, Matthai leh Luka hi. Amaute sutna panin Jesuh pen Kumpi David Tokhom a luah thei ding mah hi hiam? cih kan ni. Lungdamna Thu Matthai a gelh siahdongpa Matthai (Jesuh nungzui )in Judah mite pen khanggui kan mi ahih lam tel ahih manin a laibu sungah Jesuh pen Kumpi David Tokhom a luah thei ding mah ahihna Jesuh pa Joseph khanggui panin limtakin sut ngekngek hi. (Mathai 1:1-16) Aman a sutna panin Jesuh pen ngeina leh dan tawh kituakin zong Kumpi David suan taktak ahih manin Kumpi tokhom a luah thei ding mah hi, ciin Judah mite muanlahnate hilhcian hi. Tua mah bangin Luka in Mary pa’ (Joseph sunghpa)khanggui lampanin sut hi. Luka in Mary lampan a kan ciangin Jesuh pen David suan mah hi veve hi,ci hi.(Luka 3:23-38) Anu lam ahi-a a pa’ lampan ahizongin Luka leh Matthai sutna i et ciangin Jesuh Kumpi’ suan ahihna kitel khiallo ahih manin, a hong suak ding naungek pen naungek ngeina bangin ngaihsun loin Leitung Vantung Kumpi’ tapa taktaka i ngaihsuta zahtakna tawh muakin I biak ding thupi hi. Johan 3:16 sungah hih naungek hong kisawlna HANG kigelh hi. Pasian leh mihingte’ kikhenna a zomkik (kimat kiksak) dinga itna sangpenpen tawh hong kipia naungek hi.

Bangci bangin na zang ding hiam?

Kumpi Jesuh suah Lungdam Pawi i zat laitakin gualnopna, ci leh sa’ deihna, leh nek leh tak bek tawh i zat leh i zangkhial ding hi. Khangno tampi tak in Party bawlna, nungak-tangval thangtatna, khamtheih guihtheihte bek tawh zangin i zang khial zel uh hi. Ahizongin tutungin Kumpi’ tapa taktak ahihna tel kawmin lungsim tak tawh hih pawi i zata i lungsim Kumpi dinga i suahsak ding I hanciam hunta hi. France gamuk ngeipa Napoleon in: “Kaiser, Alexander leh keima nasepte ka ngaihsut ciangin thupi mahmah napi’n huih let mang bangin tomno kalin beipaha, ahizongin Judah mi Jesuh nasepna in mi khempeuh leh gam khempeuh zel hi. Tua ahih manin leitungah Jesuh tawh teh theih ding mihing omlo hi. Kote’n thatang tawh gam zapi ukin a sawtloin bei kik paha, ahihzongin Jesuh in itna tawh gam zapi la-in mi tampi lungsim zo a ama adingin tampitak mah in a nuntakna uh sum ngam uh hi,” ci hi.(Who is Jesus Christ?- Sailas C Nair). Kei kum 13 ka phakma in Lungdam Pawi pen sa neek pawi, van thak leh puanthak neih hunin ka ngaihsuna, kum 20 ka phakmain lawm leh gual tawh vakthapna, gualnopna leh kiphatsakna hunin ka zanga, kum 25 ka phakmain khangno lungsim utna bek tawh ka zang hi. Ahizongin kum 25 ka val ciangin biakpiakna, leenkhopna, leh biakna vaiin ka ngaihsun hi. Kum 30 ka cin ciangin bel Topa’ hong itna phawk kikna hunin ka zang hi. Lungdam Pawi nang bangci bangin na zang ding hiam? Jesuh i lungsimah Kumpi a suahna LUNGDAMNA PAWI in i zat theih tek na dingin Topa’n thupha hong pia hen.

#Hih thului pen Shillong pana kisuah Laizom vol 1, 5 Dec. 2006 ah kisuah hi.

Comments

Post a Comment

Popular posts from this blog

KA LAISIMNA LAMPI

Ka Laisimna Lampi Dr Pum Khan Pau Pasian in ka pianma nagawnin ka nuntakna paidan ding hong geel kholhsak khin hi; ahih hangin ke’n Ama hong koihsak nate ka thei kei hi. Ka Pa (Nok Swan Lian) leh ka Nu (Zen Khan Vung) in tapa guk (6) leh tanu khat (1) a neih lakpan a nihna kei pen nt 24 March 1974 in Lanva khua ah ka piang hi. Ka nu in lai gina takin a sim loh hangin ka pa pen Zomite lakah MA zo masa pawl khat ahi hi. Tua banga laisiam masa ahih theihna hang khat pen ka Pu’ deihsakna hang hi. Ka Pu in Zotlang panin a tate’ laisimna ding khualna tawh Lamka zaang na zuan hi. Tua mah bangin ka pa in ko a tate lai hong deihsakin a neihlohpi mah nangawnin saang hong kahsakin pilna hong zongsak hi. “Lawhcinna khatpeuh a kipatna neucik hi”, a kicih bangin bangmah lo pan hong kipattah ahih hangin Pasian hehpihna tawh ka
Read more

Tools of Christian Missionaries

Tools of Christian Missionaries: Influence of Education and Medical health among the Zo people in Chin Hills [i] Dr Pum Khan Pau Christian missionaries were some of the most influential actors which brought significant changes in the host environment. They came as stranger, but psychologically and professionally prepared, to an unfamiliar environment with the objective to bring transition in the host society. The primary tools often used by them to facilitate transition were the introduction of education and medical health. It is from this perspective that the present paper seeks to study the influences of education and medical health in order to understand the whole gamut of Christian conversion among the Zo people in colonial Chin Hills. The earliest Christian missionaries in Chin Hills, Rev. Arthur E. Carson and his wife Laura Hardin Carson from the American Baptist Mission, reached Haka on 15 March, 1899. They first laid the foundation of Christianity in Chin hills. Though
Read more