Chicago Ah Khualzinna
Pum Khan Pau
Post-Doctoral Fellow, Arizona State University, USA.
America gamah mi tamna pen thumna Illinois state sunga om Chicago khuapi ahi hi. Chicago min pen America
tualsuak (Native American) kammal Shikaakwa
panin a kila ahi hi. Leitung ah inn sangpen ahi ngei khan/that (storey) 108
a om Willis Tower leh leitunga vanleng tual manlah penpen (busiest airport) O’Hare
International Airport (ORD) om hi. 1833 in Chicago khua neu khat hi-a, mi 200
bek teng hi. 1837 in khuapi khatin kiciamteh pah a, leitungah khuapi khangto
manlang penpen hihna tawh ciaptehna ngah hi. Hih khuapi pen Michigan lake (bual)
geiah om hi.
Pasian hehpihna tawh March 27-30 sung Chicago khuapi ah ka zin thei hi. Laipilna
lamah Asia gam tawh kisai a kan mite (Asianist) kipawlna Association for Asian
Studies Conference, Chicago downtown a om Chicago Sheraton Hotel & Towers
ah March 26-29, 2015 sung tunga, tua khawmpi zang dinga pai kahi hi. Paper
present ding ka hih loh hangin ASU ah ka mentor Prof Yasmin Saikia in mite
kizat dan leh om dan theihna ding deihsakna tawh pai thei leng a ut manin kei
zong registration ka bawl hi. Vanleng letmat zong kha khat ma-in ka leipah hi.
Chicago Zomite kiangah hawh kawm thei ding cih lunggulhna tawh ka thalawp
mahmah hi.
March 26 nitak nai 10:30PM in Pa Hau Mung in
Phoenix airport ah hong kha hi. Tua zan (March 27 zingsang) nai 12:50AM in
Phoenix panin Spirit Airlines tawh Chicago ka leeng hi. Pasian hehpihna tawh
nai 6:00AM in O’Hare International Airport, Chicago ka tung hi. Tua zan ka ihmu
mel kei hi. Airport ah Pa Tuangno (lasiam San Lun pasal) Cikha khuami leh
tangval khat (?) in ong dawn uh hi. Vuk kia ahih manin na vot mahmah hi. Pa
Tuangno in Airport panin Chicago Sheraton Hotel & Towers omna 301 East
North ah hong kha suak hi. Chicago downtown pen inn thupi-in sang thei mahmah
hi. Inn sangpipi kitung zihziah nuai ah lampi thuap thum a paina mun zong om
lai hi. Hih bang mun ka muh masakna ahih manin thupi kasa hi. Shillong ah
research ka bawl cil computer ka neih ciangin computer game ah car racing ka
taina Chicago downtown pen Topa hehpihna tawh conference ka kahna hong suaksak
Pasian hong itna thupi kasa hi. Conference ah mi tam mahmah hi. America, UK, Australia,
Southeast Asia leh Asia panin kipaikhawm hi. Panel 322 om hi. Tua ah eima
lunglutna mun tekah kihel ding hiziau hi. Southeast Asia leh South Asia
panel-te ah ka kihel hi. Paper present ka hih loh hangin scholar tuamtuamte
thugen ka ngaih theih hampha ka kisa hi. Hih bang conference ah paper present
theihna dingin kum khat ma-in piak kholh kul hi.
March 27 ni Conference ah The
Structure of Chin Society gelh Marki pa (Prof F. K .Lehman) leh a zi tawh
zong kimu-in maan ka kila hi. Marki-pa tawh kum 2008 in Aizawl ah International
Conference ah ka kimu ngei uh hi. Maitrii Aung Thwin (National University of Singapore)
leh Southeast Asianist pawlkhat tawh zong kimu thei-in visiting card ka ngen
hi. Nitak nai 5:30PM in Pil Mung-te innkuan in Sheraton Hotel ah hong dawn uh
hi. Downtown sung tawmkhat vel-in tua pan ka ciah uh hi. Ciah lamin Sen ansai
ah nitak ann hong nekpih uh hi. Tua panin ka zin tunna ding Pa Munglek inn,
Wheaton ah hong kha uh hi. Malaysia panin hong tung thak Mungbawi in ama room
hong awn a, nuamtakin ka tawldam thei hi. Zanin ka cisa pian ahih manin nai
4:00 AM pawlin paracetamol tangkhat ka ne hi. Zingsangin zong ka omdan ngap pha
nailo ka hih ciangin ciin tuani Conference kah kik dinga ka ngaihsut pen pailo-in
inn ah ka tawldam hi.
Sun ciangin ka zintunna ah Pa Thomas Thang Khan Tuang (Tuangpu) ong hawh
a, ka kiho uh ciangin aman ong na thei mahmah laizang hi. Tulsa ka pai akipan
ka thu naza hih tuak hi. U Tuang pen 1994 pawlin ka khua Lanva ah Pa Sai Khen-te
inn ah sum thalawh in tawlkhat om ngei ahih manin tua hangin Lanva tangthu zong
na thei peuhmah lai hi. Mite min bang gen setset lai ahih manin a khuak hoih
kasa hi. Ong thei mahmah khat ka tuah khak manin kei adingin nuamtuam peuhmah hi. March 28
sunin U Tuang in The Billy Graham Center ah hong hawhpih hi. America ah Pasian
thu a khanna leh khanlawhna a tundan thu akipan Billy Graham nasepnate kepna
Museum hi-a, thupi mahmah hi. Graham college kahna Wheaton college zong a galah
om pah hi. Maan tampi ka la hi. Laibu khat leh DVD khat lei dinga ka lak leh U
Tuang in sum ong piaksak sawnsawn hi.
Tualo laibu dang thum free gift ka la hi. Nitakin U Tuang in a inn ah hong
paipihin nitak ann ka ne uh hi. Nitakin Chicago Zomi Christian Church (CZCC)homecell
kikhopna Munglek inn ah kinei-a, thugenna ka nei hi. A khangnote uh
Indianapolis ah gospel pai citciat ahih manin mi tam khollo hi. A siapa uh Sia
Mung in PhD Old Testament a sin laitak
ahi hi. Tua nitakin Joshua 1 bulphuhin America ah Pasian hong puakna leitang
hoih ah thuphate I san theihna dingin thahat
ding, hang ding, laulo ding leh lungkialo dingin hanthotna ka nei hi. Nai
11:30PM pawlin ka man uh ciangin ka Pu Kham Lian Mung apartment ah giak dingin
Pil Mung in hong kha hi. Pu Mung pen Malaysia panin February kha a hong tung
hi-a, amah tawh zong tomno bek mah kiho manin ka lum uh hi.
March 29 pen Nipini hi-a, Palm Sunday zong ahi hi. Pil Mung in
conference ah ka pai lai ding ong deihsak manin tua zingsang nai 7:30 AM in downtown
lam ka delh kik uh hi. Pu Mung leh Mungbawi zong downtown pai nailo ahih manun
amau ong zui thei hi. Sheraton Hotel & Towers ka tun uh ciangin kei conference
panel ah kihelin ka lawmte in hong ngak kawmin khuapi sung na vak uh hi.
Session nih ka kihel man hi. Prof Yasmin Saikia tawh zong ka kimu thei hi. Nai
12 pawlin lawmte tawh Wheaton lam ka delh kik vingveng uh hi. Nai 1 sung phial
mawtaw tawh paina ahi hi. Pil Mung mah in Vietnam sai ah zingann hong nekpiha,
tua khit ciangin biakinn ah kikhawm dingin ka pai uh hi. Chicago Zomi Christian
Church kikhopna nai 2 in kipan hi. Hih kikhopna ah numeite in makaih hi. Ken
thugenna ka nei hi. Na ciah kik nuam mai
uh hiam? cih thulu pansanin Palm Sunday leh thu tuamtuam ka gen hi. Ka
thugen man lian ciangin downtown lama om Chicago Zomi Bethel Church (CZBC) ah
thugen dingin ko mi li teng mah zingsanga ka painasa teng mah uh tawnin ka tai
kik pah uh hi. Tuani a kithuah koteng pen Pil Mung in Mung 3 + Pau 1 Gospel team ci liang hi. A taktakin Pil Mung
kipiakzawhna hangin tua zaha kigamla mun ah nihvei thumvei a kileh kawikawi
thei ka hi uh hi. CZBC ah Tangthu
kikhelsak ding cih thu ka gen hi. Hih pawlpi ah sia a sem pen Bungmual,
Lamka panin Sia Nengsianthang (Ashley Phaipi) te nupa ahi hi. Amau Lai Siangtho
sin a om ahi hi. Kikhop man ciangin nai 5:40PM pawlin Wheaton lam ah ka taito
kik uh a, nai 6:30PM pawlin U Tuangpu te inn ka tung uh hi. Tua mun ah nitak
ann ne-in holimna hun nuam ka ngah kik uh hi. Nitakin San Lunte nuta zong ong hawh hi. San Lun leh Pil
Mung pen Pa H. Gin En Cin tate ahi uh hi. San Lun pen Ngaih Anglai Ah film sungah lasa pen ahi hi. Nitak in thungetna ka
nei khawm uh hi. Tua ciangin ka kithuahpihte ciah uh a, kei ka giak suak hi.
U Thomas Tuang pen holim a thanuam mahmah khat ahi hi. Minam vei-in na
tampi sem khin hi. Aman Zomi DVD/CD tampitak na hawm khin a, tun zong Sia Do
Khup late a bawlsak a hawm laitak ahi hi. Ama tung panin DVD/CD pawlkhat ka
ngah hi. Zomi T-shirt a bawluh zong nih tak hong pia hi. March 30 ni zingann
nek khit ciangin U Tuangpu in a naupa Munglek inn ah hong kha hi. Tua pan Pil
Mung tawh kituah kikin aman hong vakpih kik hi. Mungbawi in zong hong zui thei
kik hi. Kum 1850 kim pawla Naper innkuante tenna mun leh vante kepna Naperville
museum ah ka pai uh hi. Nidanga Naper family-te tangthu leh amau hunlai a
nuntakzia uh, inn leh vanzatte limtakin kikem hi. Siksekna, vaimim lo,
post-office, zuthawl dongin nidang lai a vanzatte uh ka muh ciangin
Americate zong Zomite mah a bat hun na om lua ahih lam hong musak hi.
Naperville panin inn leithak Pa Liante inn ah bangin tua pan CZCC
president Pa Pau Cin Lian te inn ah ka pai uh hi. Pa Pau Cin ten Sushi sai hoih
mahmah nei hi. Amah Chicago a tunma-in Arizona ah na tung masa hi; 1997 in Arizona
tunga, ama tunma-in Carey Tuang kici khat na tung khin hi, ci hi. 1999 dong tua
mun ah om hi. Amau inn ah nitak ann ne-in tua pan nai 7:30PM in ORD airport ah
Pil Mung Mungbawi in hong kha hi. Nai 9:15PM in Spirit Airlines tawh Phoenix
zuan dingin ka ciahkik hi.
Topa hoih mahmah a, Ama hoihna mite tungtawnin hong lak hi. Hih zah a
hong buaipih ding, hong it ding leh hong deihsak ding mi hong piak pen Topa
hoihna hang bek hi. A diakin Pil Mung bang in a mawtaw tawh hong puak
kawikawina bekbek zong meitui tampi bei ding banah a hun leh tha gimnate
khempeuh hong itna hang hi kei leh pianglo ding hi. Ci leh sa lamah zong
kinaina ka neih uh hangin Topa a itna hang mah tawh tua bangin hong buaipih zo
hizaw hi, ciin ka ngaihsun hi. Topa in Chicago ah innteek mahmah ngam ding zah
in ka maban hong honsak manin ka lungdam hi. Ama hoihna leh kei tungah a
thuphate sim zawhloh dingin hong tungsak tawntung hi.
March 30 nitak nai 11:00PM in Phoenix ka tung kik hi. Airport ah Pa Hau
Mung leh Tung in hong dawn hi. Cidamin Topa in inn hong tungkik sak hi. Keima
hanga a buai, a sumte khempeuh Topa in a hehpihna tawh thupha tamsem hong piaksak
ta hen.
To God be the Glory.
Comments